Lokale
Arifi këmbëngulës për ndërtimin e objektit universitar (foto)
Në ambientet e shtëpisë së Kulturës në Bujanoc është hapur zyrtarisht viti akademik shkollor 2013/2014 i degës së fakultetit ekonomik të Suboticës në Bujanoc pran Universitetit të Novi Sadit.
Të pranishëm në këtë solemnitet ishin profesorë, dekan të këtij institucioni universitar, shefi i Bashkimit Evropian në Serbi Majkëll Davenport, shefi i OSBE-së Peter Burkhard, kryetari i komunës së Bujanocit Nagip Arifi, kryetari i Trupit Koordinues Zoran Stankoviq, Galip Beqiri nga këshilli Kombëtar Shqiptarë dhe studentë të shumtë.
Dekani i Fakultetit Ekonomik të Suboticës Nenad Vunjak duke i uruar studentët për suksese në mësime shprehi edhe faktin që në këtë universitet po shkollohen edhe studentë të pakicës shqiptare dhe asaj rome.
“Ne sot festojmë ditëlindjen e dytë të funksionimit edhe pse shumë kush ishte skeptik në hapjen e këtij fakulteti andaj juve studentë ju mbetet të mësoni për të mirën tuaj”, tha Vunjak.
Shefi i Bashkimit Evropian në Serbi, Majkëll Davenport shprehi kënaqësinë tij për studentët që janë bashkuar në kërkim të dijës për të ardhmen e tyre dhe prezencës së partnerëve që ndihmuan hapjen e këtij fakulteti.
“Përmes këtij projekti ne shohim progres në shkollimin e pakicës shqiptare në Serbi dhe do të vazhdojmë të investojmë më shumë në avancimin e kushteve të shkollimit “, deklaroi para studentëve Davenport, raporton Titulli.
Ndërsa kryetari i komunës së Bujanocit ka shprehur shqetësimin e tij lidhur me funksionimin e këtij fakulteti dhe mungesën e një objekti adekuat si dhe mungesën e kuadrit vendor profesional dhe atij të administratës.
“I bëjë thirrje të gjithë atyre që po mundohen ta pengojnë funksionimin e këtij fakulteti të na bashkohen në udhëtimin tonë për ta ndërtuar një perspektivë të ndritshme për qytetarët e komunës së Bujanocit dhe më gjerë’”, është shprehur i emocionuar Arifi.
Arifi deklaroi se buxheti komunal ndan 50 mijë euro çdo vit dhe se që nga viti 2002 Bujanoci është duke u munduar të ofroj kushtet për shkollim të lartë.
Nga ana tjetër shefi i OSBE-së Peter Burkhard tha se “të gjithë së bashku do të punojmë që Bujanoci të përmirësojë kushtet e shkollimit të lartë.
Muhedin Fijuljanin, sekretar në ministrinë arsimit, shkencës dhe zhvillimit të teknologjisë në Serbi përcolli porosinë tek studentët se çdo vit po përmirësohen metodat e shkollimit që e bënë studimin më të lehtë dhe më të avancuar.
Edhe kryetari i Trupit Koordinues për Preshevë ,Bujanoc dhe Medvegjë Zoran Stankoviq tha se ai do të vazhdoj të mbështesë funksionimin e këtij fakulteti duke ofruara edhe kushte më të mira të infrastrukturës.
Mirëpo edhe studentët janë shprehur të kënaqur me ecurinë e ligjëratave për arritjen e dijës në këtë universitet dhe kanë kërkuar që të punohet më shumë në përmirësimin e kushteve të infrastrukturës.
Fakulteti Ekonomik në Bujanoc është degë e Fakultetit Ekonomik të Suboticës pranë Universitetit të Novi Sadit dhe ka të regjistruar afro 260 studentë, ku gjysma e tyre janë shqiptarë dhe të tjerët janë serb dhe rom.
Kjo paralele në Bujanoc është i hapur në tetor të vitit 2011dhe ligjëratat zhvillohen në gjuhën shqipe dhe atë serbe, ndërsa kuadri akademik shqiptar vjen nga Universiteti i Tetovës me të cilin Universiteti i Novi Sadit ka bashkëpunim të ndërsjellë./Titulli.com/
Mund ti tregoni shoqërisë për këtë artikull!
