Lokale
SHQLPK: Reagim ndaj fyerjeve raciste të Qosjes ndaj shqiptarëve të Luginës
Shoqata e qytetarëve të Luginës së Preshevës në Kosovë ka reaguar ndaj deklaratave të akademik Rexhep Qosja i cili në prononcimet e tij të fundi lidhur polemikat me Hevzi Islami, drejtuesi i Akademisë së Shkencave dhe Arteve të Kosovës e ka quajtur fshatar dhe gjithë udhëheqësit e ASHAK si klan të Luginës.
Qosja në polemikat e tij ka thënë se ASHAK po drejtohet nga klani i fshatrave të Luginës së Preshevës.
----------------------------------------------------------------------------------------------------------------------------------------------
REAGIM
Në polemikat që po zhvillohen në medie midis Akademisë së Shkencave dhe të Arteve të Kosovës (ASHAK) dhe Kryetarit Akademik Hivzi Islami, Nënkryetarit Akademik Pajazit Nushi dhe autorit të “Revolucionit të Vonuar Demokratik” (RVD), Akademik Rexhep Qosjes, ka dalur në sipërfaqe i tërë vreri dhe shfryerja e dufit primitiv e racist të këtij të fundit.
Ky zotëri zemërprisht e i matufosur, me dorë të vet shkruan disa ide që nuk i kanë hije një qytetari normal dhe intelektuali shqiptar: “Rexhep Qosja nuk është pajtuar pse tani e pesëmbëdhjetë vjet ASHAK-un e drejton, në të vërtetë e privatizon Klani i fshatrave të Luginës së Preshevës duke qenë anëtarët e tij 15 vjet njëri pas tjetrit kryetar në dy mandate, nënkryetarë në dy mandate, sekretar i Përgjithshëm i ASHAK-ut në dy a më shumë mandate? Si mund të ndodhë kjo, si lejohet kjo, që një Klan i krijuar mbi bazë lokale dhe partiake, i vetëportretizuar në 55 pyetjet e publikuara, të uzurpojë, në të vërtetë të bëjë shtëpi private një institucion me rëndësi shoqërore e kulturore, tani e sa kohë mjerisht tejet të zhvlerësuar dhe të komprometuar”.
A ka gjuhë më të ulët dhe më primitive e jocivilizuese se kjo?
Me urrejtje primitive ndaj gjithëçkafes të mirë që i ka ndodhur deri më sot shqiptarve në këtë Tokë të Bekuar, ky njeri ka urryer me shpirt Presidentin historik të Republikës së Kosovës Dr. Ibrahim Rugovën, duke vajtuar që edhe Kosovës nuk po ndodhë “Revolucioni i Vonuar Demokratik” që në vitin 1997 desh e zhbëri nga faqja e dheut Shqipërinë, tani ka marrë guximin dhe është trimëruar nga mbështetja e 37 akademikëve komunistë të Shqipërisë për të na servuar të njejtën gjellë Enveriste.
Kurse, së fundi, nuk keni marrë as guximin më të vogël që t’i përgjigjet publikisht “55 Pyetjeve…”, që sa duket janë edhe përgjigje e pamohueshme dhe e vërtetë e madhe për karakterin Tuaj të mjerë.
Madje, thuhet se në ato pyetje-përgjigje nuk është përfshirë as e qinta pjesë e të (pa)bëmave Tuaja të turpëshme, jomorale dhe antishqiptare!
Si fshatar i fshatit Vuthaj të Malit të Zi, Ju z. Qosja fyeni me një gjuhë rrugaçësh, duke e quajtur Partinë e dikurëshme Fshatare të Kosovës, si “Parti e Katundarëve, kurse Akademikët e Luginës së Preshevës i quani “ Klani i fshatrave të Luginës së Preshevës”, duke fyer kështu të gjithë shqiptarët e Luginës së Preshevës!
Me një gjuhë të fëlliqur, primitive e meskine, Ju doni të tregoni se “ja, e tërë Lugina përbëhet nga fshatrat dhe fshatarët dhe se aty qytetari e qytetërim nuk ka dhe nuk ka pasur kurrë”!
Ky fjalor racist, nga një Akademik shqiptar, në një shtet të lirë e demokratik, që pretendon të radhitet në familjen e kombeve dhe shteteve demokratike europiane e botërore, nuk ka dhe nuk guxon të ket vend.
Ndaj tij duhet ngritur procedura ligjore dhe të konstatohet gjendja e shëndetit të tij mendor.
Poqese konstatohet se nuk është matufosur, apo nuk vuan nga ndonjë sëmundje mentale, atëherë kërkojmë që të përgjigjet para Ligjit dhe Drejtësisë për fyerjet raciste që ua ka bërë shqiptarve të Luginës së Preshevës dhe të tjerëve!
Zoti i bekoftë shqiptarët, kudo që janë!
Prishtinë, më 15 mars 2014
Kryetari, Nehat Hyseni
Mund ti tregoni shoqërisë për këtë artikull!
