Lokale
Zoti ia 'kursen' 6 milionë dinarë Bujanocit (video)
Moti i cili këtë vit po mbretëron në rajonin tonë ka bërë që disa ndërmarrje të kursejnë mjete nga buxheti i tyre.
Moti pa të reshura të borës ka mundësuar që ndërmarrja publike Drejtorati për Ndërtim në Bujanoc të kursejë 6 milionë dinarë.
Nga kjo shumë e dedikuar për pastrimin e rrugëve nga bora në komunë të Bujanocit, deri më sot nuk është harxhuar asnjë dinarë.
“Nga mjetet e parapara prej 6 milionë dinarëve, deri në këtë moment nuk kemi harxhuar asgjë”, i tha të mërkurën portalit Titulli, drejtori i Drejtoratit për Ndërtim Agim Haliti.
Sipas tij, ndërmarrja e kontraktuar për mirëmbajtjen e rrugëve është “Saba Bellça”, e cila në konkursin e hapur ka ofruar çmim më të ulët për pastrimin e rrugëve, mirëpo i njëjti ofertues nuk ka kaluar asnjë orë në terren, pasi nuk kishte borë.
“Pasi kontrata parasheh pagesën në bazë të orëve të realizuara në pastrimin e rrugëve, ndërmarrja e kontraktuar nuk është ftuar për të dalë në terren, meqë në komunën tonë nuk kishte rrugë të bllokuara nga bora”, është shprehur Haliti.
Për dallim nga dimri i sivjetshëm, në të kaluarin, nga shuma e përgjithshme prej 6 milionë dinarëve për pastrimin e rrugëve nga bora, ishin shpenzuar mbi 1 milion dinarë.
Haliti, me këtë rast sqaroi se mjetet e kursyera, pas rebalancit të buxhetit, do të dedikohen në projekte të tjera.
Vlen theksuar se para këtyre dy viteve stina e dimrit nuk ishte edhe aq e mëshirshme me këtë rajon. Bora që kishte rënë atë kohë kishte shkaktuar tollovi në komunikacion, derisa në vendet malore trashësia e borësi ishte mbi gjysmë metri./Titulli.com/
http://youtu.be/XM8cxlyDbkM
Mund ti tregoni shoqërisë për këtë artikull!
