Stuhi breshri në Beograd, pritet përkeqësim i kushteve të motit
Një stuhi e fuqishme breshri ka përfshirë Beogradin këtë të shtunë, duke përmbytur disa lagje për orë të tëra në kryeqytetin serb.
Stuhia u shoqërua me erëra të forta dhe shi, si dhe një rënie të madhe të temperaturave, duke bërë që qytetarët të shmangin lëvizjet e panevojshme
Instituti Hidrometeorologjik i Serbisë njoftoi qytetarët se moti do të jetë shumë i paqëndrueshëm dhe për orët në vijim teksa priten rrebeshe të mëdha deri ditën e diel.
Ministria e Brendshme e Serbisë bën me dije se i ka ndërmarrë të gjitha masat e nevojshme për të përballuar situatën e krijuar nga moti i keq.
Prej disa ditësh Evropa është përfshirë nga moti i keq. Situata më e rënduar është regjistruar në Slloveni ku ka pasur të paktën 3 viktima nga përmbytjet, ndërkohë që dëme janë shënuar dhe në Gjermani, Kroaci, Austri e Itali.
Ndryshe paraqitet situata në kufirin mes Spanjës dhe Francës ku autoritet po luftojnë për të shuar vatrat e zjarrit të përhapura nga moti i nxehtë.
