Mbahet takimi ndërmjet koalicionit PVD- UDSH dhe PD-së (video)
Në zyrën e PVD-së në Bujanoc sot u mbajt një takim ndërmjet koalicionit PVD-UDSH dhe PD-së rreth krijimit të koalicionit qeverisës në komunën e Bujanocit pas zgjedhjeve të mbajtura më 24 prill, raporton Titulli.com.Pas këtij takimi, Ragmi Mustafa, nga koalicioni PVD-UDSH tha se ky koalicion si fitues i zgjedhjeve do të ftojë të gjithë partitë për biseda dhe bashkëpunim.
“Duke vënë interesin e shqiptarëve në rend të parë, kemi ftuar listën e dytë e më pas do të ftojmë edhe listat tjera. Për ne është e rëndësishme të dimë a mund të gjejmë rrugë të bashkëpunimit”, tha Mustafa.
Sa i përket ndarjes së pushtetit, sipas Mustafës, do të formohen grupet teknike, dhe bazë do të jetë programi i koalicionit PVD- UDSH.
Kryetari i Partisë Demokratike, Nagip Arifi, tha që “jemi në parim për themelimin e qeverisjes lokale me koalicionin PVD-UDSH, por edhe subjektet tjera”.
“Kemi biseduar vetëm në parim, nuk kemi biseduar për asnjë funksion, pritet që brenda 2-3 ditëve koalicioni PVD-UDSH të na dërgojnë ofertë me shkrim rreth funksioneve”, tha Arifi.
Koalicioni PVD-UDSH, me bartës Shaip Kamberin, ka dal fitues i zgjedhjeve lokale në Bujanoc me 12 këshilltarë, PD doli e dyta në zgjedhje me 10 këshilltarë, ndërsa partia e tretë shqiptare LPD ka fituar 4 këshilltarë./Titulli.com/
