Musliu proteston para Vuçiqit: Ku janë tekstet në gjuhën shqipe? (Foto & Video)

“Dialogu” u hap në momentin kur kryeministri Vuçiq doli në foltore, përderisa nga ulësja në amfiteatër, ku po përurohej hapja e godinës së re të degës së Fakultetit Ekonomik të Suboticës në Bujanoc, u paraqitë kryetari i KKSH-së Jonuz Musliu, duke kërkuar nga kryeministri lirimin e teksteve për nxënësit shqiptar që po mbahen në terminalin doganorë, donacion të Ministrisë së Arsimit të Qeverisë së Kosovës.

“Ku janë librat, ku janë librat...”, iu drejtua Musliu, Vuçiqit, ndërsa ky iu përgjigj: “Jonuz, nëse mendon se jam frikuar atëherë je mashtruar keq”, ku më pas pasuan duartrokitjet në sallë, raporton Titulli.com.

Gjatë kësaj kohe kryetari i Komunës së Bujanocit, Nagip Arifi, i sugjeronte me dorë Musliut që të ulej, kurse Musliu vazhdoi debatin me Vuçiqin.

“Po flas me argumente, nuk po lejoni librat, po i mbani të burgosura”, u shpreh Musliu, ndërsa kryeministri iu përgjigj se “librat nuk maten si derrat dhe kamionët me kilogramë, por me kualitetin e librit”.

Musliu insistonte të merrte përgjigje nga kryeministri se kur mund të lirohen librat, kurse ai sërish i përgjigjet: “Jonuz, librat nuk mund të arrestohen”, mirëpo kryetari i KKSH-së i thotë se ato i keni arrestuar.

Ky debat i nxehtë është zhvilluar para Ministritë të Arsimit të Serbisë si dhe korit diplomatikë, pjesëmarrës në përurimin e godinës së Fakultetit Ekonomik të Suboticës, dega në Bujanoc. /Titulli.com/

VIDEO