Ekskluzive: Emisari i SHBA-së Escobar të mërkurën në Kosovë, me një “mision më të gjerë”
Gabriel Escobar, emisar special i ShBA-së për dialogun Kosovë – Serbi, vjen nesër në Prishtinë. Siç merr vesh Gazeta Express, ai do t’i mbledhë edhe krerët e opozitës në Ambasadën amerikane.
Një javë pasi sekretari amerikan, Antony Blinken, bisedoi përmes telefonit me Kryeministrin Albin Kurti, i dërguari i SHBA-së për dialogun vjen në Prishtinë. Edhe kësaj radhe me një “mision më të gjerë”.
Gazeta Express mëson se, përveç takimit me qeveritarë, Escobar ka ftuar tre kerët opozitarë, Memli Krasniqin e PDK-së, Lumir Abdixhikun e LDK-së dhe Ramush Haradinajn nga AAK-ja, për një takim në Ambasadën amerikane në Prishtinë. Takimi pritet të mbahet nesër në mesditë.
Kjo është hera e dytë brenda muajve që i angazhauari special amerikan për Ballkanin Perëndimor dhe dialogun vjen në Kosovë dhe mbledh opozitarët.
Herën e fundit, Escobar ka darkuar me të gjithë krerët e partive opozitare parlamentare, së bashku, në rezidencën e ambasadorin amerikan, Jeff Hovenier.
Atë kohë, emisari amerikan erdhi në Kosovë, pak ditë para afatit kur pritej të hynin në fuqi dy vendimet e Qeverisë për zbatimin e marrëveshjeve për reciprocitet në dokumente dhe targa të Serbisë. Ndërkombëtarët që po i druheshin eskalimit të situatës zbarkuan në Prishtinë.
Javëve të fundit është intensifikuar ndërhyrja e ndërkombëtarëve në dialogun Kosovë -Serbi.
Përveç telefonatës së Sekretarit Blinken me Kryeministrin Kurtin dhe Presidentin serb, Aleksandër Vuciq, janë angazhuar edhe Kancelari gjerman, Olaf Scholz dhe Presidenti Emmanuel Macron. Këta të dy u kanë dërguar Kurtit e Vuciqit propozime përmes këshilltarëve të tyre që vizituan Prishtinën e Beogradin në shtator.
