Kamberi: Lleshi nuk luftoi që gratë shqiptare t'i fshin vendbanimet serbe (video)

Kryetari i degës së PVD-së dhe deputeti Shaip Kamberi, përveç që ka radhitur të arriturat e KKSH-së ka thënë se pjesëtarët e partisë së tij patën guxim, ide dhe vizion edhe atëherë kur partitë e tjera këtë institucion e quanin antishqiptar, ndërsa tani janë në garë të gjithë, që sipas tij në aspektin politik është një njohje e vizionit politik të PVD-së dhe UDSH-së.

Ai tha se politika revanshiste që po udhëhiqet ndaj shqiptarëve, posaçërisht në Bujanoc, nuk guxon të bartet edhe në Këshillin Kombëtar.

“Politika e standardeve të dyfishta nuk guxon të bartet edhe në Këshillin Nacional, sepse pasojë e kësaj politike janë dhjetëra shqiptarë të përjashtuar nga puna, që maltretohen në vendet e tyre të punës, janë disa gra që dërgohen me i fshi vendbanimet serbe nga një drejtorë i cili me krenarinë e vet, besojë e ulët, jam bashkëpunëtori dhe shoku i idealit i Komandant Lleshit. Unë i them jo, Komandant Lleshi nuk ka luftu që gratë shqiptare me i fshi vendbanimet serbe”, tha Kamberi.

“Në politikën manipulative që e udhëheqin subjektet e caktuara në Luginë të Preshevës e që seriozisht kanë dëmtu të ardhmen tonë, shenjat vërehen edhe tash. Vërehen shenjat se njeriu kur nuk ka virtytet e veta, vlerat e veta, mandej mburret me paraardhësit e vet, edhe paraardhësit që si ka paraardhës. Mburrja kryesore na del dje si margaritar se jam nipi i Lam Breznicës. Unë them Lam Breznica po të ishte gjallë, sepse e kam takuar disa herë, nuk do ta kishte pranuar për nip njeriun i cili Mira Markoviqin e ka shpallur qytetare nderi”, u shpreh në këtë tribunë përmbyllëse, Kamberi.

Ai duke u ndalur tek Lam Breznicës, anëtarët e familjes të cilët e kishin kontaktuar deputetin, tha:  “Një orë më parë familjarët e ngushtë të Lam Breznicës më porositën që opinionit t’ia bëjë me dije një çështje, ata që po thirren në emër të Lam Breznicës, le ta dinë se Lam Breznica i ka tetë nipa dhe mbesa me fakultet dhe gjashtë prej tyre janë në botën e jashtme, sepse nuk i kanë bë vend me punu. Kjo është filozofia mashtruese që po na imponohet me radhë, nga lapidari, zgjedhjet parlamentare, prej fillimit të sistemit shumë partiak”.

Deputeti dhe kryetari i Partisë për Veprim Demokratik Riza Halimi, ka vënë në dyshim doktoraturën e kryetarëve të komunave Preshevë e Bujanoc, duke e quajtur manipulim.

“Në Serbi po bëhen debate për këtë punë, derisa ministrave po i kontestohen diplomat, këtu po heshtin njerëzit, a e dinë se doktoratura është në Universitetin e Novi Pazarit që s’ka akreditim. Ku kanë shpallë punime shkencore këta dy zotni për me ardh te doktoratura. Doktori i shkencave duhet me pas punime shkencore, revista shkencore, pjesëmarrja në konferenca shkencore e institucione, nëse s’ke marrë pjesë në to, atëherë nga doli doktoratura. Vetëm mbetet me u ble dhe s’ka tjetër”, u shpreh Halimi.

Ai gjithashtu tha se “është boll dhe është tepër nëse edhe në Këshillë Nacional do të hyjë me dy këmbë manipulimi, që janë me të madhe duke e përdorë në pushtetin lokal të Preshevës e të Bujanocit”.

Ndërsa, kryetari i Këshillit Kombëtar Shqiptar, në tubimin e mbajtur në Bujanoc, Galip Beqiri, ka pohuar se ka ngecje të zbatimit të dygjuhësisë në shumë institucione e organizata.

“Në gjykata në polici, në ndërmarrjet publike ku shqipja është zero, në Bujanoc poashtu edhe në Preshevë, drejtorët shqiptarë, sekretarët organizatave publike shqiptare, drejtorët e shkollave shqiptarë, hala sot shkruhet edhe merren vendime në gjuhën serbe”, tha Beqiri.

“Krejt këto janë problematika që i zgjedhë dhe mundohet t’i zgjedhë KKSH. Ne nuk kemi bërë mrekulli por kemi punuar, kemi punuar me përkushtim të madh”. U shpreh kryetari i Këshillit.

Ai tha se 3-4 ditët e fundit anëtarët e PVD-së frikojnë të vijnë në tubim për shkak të kërcënimeve se do të largohen nga puna. “Këto dukuri nuk janë normale dhe duhet t’i ndalim”, u shpreh Beqiri.

Partneri i koalicionit, kryetari i UDSH-së, Rahmi Zulfiu, u ndal tek zbatimi i gjuhës dhe shkrimit shqip në institucionet komunale, doku i porositur zyrtarët e këtyre institucioneve që të zbatojnë këtë të drejtë të shqiptarëve të cilën e garantojnë edhe Kushtetuta dhe Ligji i Serbisë.

“Ata le të urdhërojnë atë gjuhë shqipe e cila është e garantuar edhe me Kushtetutë edhe me Ligj të Serbisë, le ta aplikojnë në dokumentet që i lëshojnë në pushtetet lokale”, tha Zulfiu.

Ardita Sinani, kandidate për Këshilltare në Këshillin Kombëtar nga lista “Koalicioni për të drejtat e shqiptarëve”, tha se vota është e shenjt siç është i shenjt edhe votuesi.

“Do t’i mbrojmë nga oligarkët, nga disa pseudopatriot të cilët me komoditetin e krijuar nga pushtetet lokale manipulojnë me votuesit. Patriotizëm është të përballesh me sfida gjatë gjithë kohës, të veprosh kur të tjerët nuk guxojnë”, u shpreh para simpatizantëve kandidatja Ardita Sinani.

Ajo tha se u dëshmua që koalicioni i tyre kishte të drejtë, andaj më 26 tetor të rrethohet numrin 3.

Tubimet e sotme të koalicionit PVD-UDSH, të mbajtura në Preshevë dhe Bujanoc, ishin të fundit. Nga mesnata Lugina do të jetë në heshtje parazgjedhore./Titulli.com/ 

Program parazgjedhor