Situatë e rëndë në Medvegjë, vlerësohet në tubimin PD-së (foto & video)
Lista “Partia Demokratike –Dr. sc. Nagip Arifi” sot ka qëndruar në Medvegjë ku ka zhvilluar tubimin parazgjedhorë me shqiptarët e kësaj komune për zgjedhjet e Këshillit Kombëtar Shqiptar (KKSH).
Në këtë tubim, pas atij në Lluçan, u shpalosë programi i koalicionit të Partisë Demokratike (PD) dhe Bashkimit Demokratik të Luginës (BDL), për komunën e Medvegjës.
Kryetari i nëndegës së PD-së në Medvegjë, Bajram Mustafa, para të pranishmëve foli rreth problematikave me të cilat ballafaqohen shqiptarët e kësaj komune, sidomos në katër fushat kompetente të Këshillit Kombëtar Shqiptar.
Për këtë gjendje të rëndë, sidomos në lëmin e arsimit, u ankuan edhe dy arsimtarët të shkollës shqipe, duke numëruar problemet me objektin e deri te mungesa e drejtorit në shkollën e vetme shqipe, pasi siç thanë “me vite nuk kanë drejtor, por ushtrues detyre”.
Lidhur me këtë problematikë, kryetari i Partisë Demokratike Nagip Arifi ritheksoi edhe njëherë se në të ardhmen nuk do të ketë më ushtrues detyre, por drejtorë me mandatë të rregullt, raporton Titulli.
Në fushën e kulturës premtoi sjelljen e shoqërive kulturore-artistike nga Kosova e Shqipëria, sikurse ato po i vizitojnë komunat Bujanoc e Preshevë.
Arifi, duke folur për informimin, tha se televizioni publik i Medvegjës i cili deri më sot nuk ka përcjellë aktivitete e shqiptarëve në këtë komunë, në të ardhmen do ta bëjë një gjë të tillë.
Në këtë tubim u paraqitë shqetësimi se deri më sot në kutitë votuese PD-së nuk i janë lejuar që të ketë anëtarë vëzhgues.
Kandidati i propozuar për këshilltar në Këshillin Kombëtar Shqiptar nga Partia Demokratike, Zejni Fejzullahu, para masës theksoi se me zgjedhjen e përbërjes së re në këtë organ do të ndryshohet edhe menaxhimi me të në fushat që ajo është kompetente.
Kryetari i Forumit Rinor të PD-së, Sali Salihu, nënvizoi se lista e koalicionit ka tetë kandidatë nën moshën 35 vjeçare, që bien në kategorinë e rinisë.
Lista “Partia Demokratike – Dr. Sc. Nagip Arifi” të dielën fushatën do ta vazhdojë në Malësi të Bujanocit, në Muhoc me fillim prej orës 17:00 ndërsa në Breznicë nga ora 19:00./Titulli.com/
Program Parazgjedhor
